Skotland


Hugmynd að áhugaverðri og skemmtilegri ferð um fallegar sveitir skozku Hálandanna. Nokkuð verður lagt upp úr því að kynnast frægustu framleiðsluafurð Skota, viskíi.

 
Flogið til Glasgow og lent þar klukkan 10:40. Ekið þaðan til Stirling og síðan áfram til Pitlochry. Þar gefst kostur á að heimsækja Edradour, sem er minnsta viskí-eimingarstöð í Skotlandi. Þar fræðumst við um framleiðsluferlið á malt-viskíi og fáum að bragða á veigunum. Í lok dags er komið til bæjarins Grantown-on-Spey í Speydalnum þar sem við munum gista næstu 4 nætur. Kvöldverður á hóteli. 

Farið í dagsferð um svæðið sem kennt er við ána Spey. Hér er að finna litrík þorp og bæi og fagurt landslag en ekki síst er Speyside þekkt fyrir viskíframleiðslu enda er hér að finna um helming allra maltviskí-eimingarstöðva í Skotlandi. Um hádegi er komið til Elgin, sem er sögufræg borg og hefur oft verið nefnd “minnsta borg Skotlands” og einnig ”viskí-höfuðborg veraldar”. Við gefum okkur svolítinn frjálsan tíma til að litast um í Elgin en þar er m.a. að finna, fyrir þá sem áhuga hafa, verzlun Gordon & McPhail , sem státar af einhverju mesta úrvali af maltvíski sem finna má á einum stað. Meðan við stönzum í Elgin býðst hópnum að heimsækja Glen Moray viskíframleiðsluna og bragða á framleiðslu þeirra. Síðdegis er síðan ekið um Rothes og til Dufftown. Sagt hefur verið að “Róm sé byggð á hæðum sjö en Dufftown standi á kötlum sjö”. Reyndar er það svo að í dag eru viskí-eimingarstöðvarnar í Dufftown níu talsins. Við stönzum í þessum áhugaverða bæ og þar býðst þeim sem vilja að heimsækja Balvenie viskí-framleiðsluna og bragða á veigunum þar. Við komum svo aftur til Grantown í lok dags en gefum okkur tíma til þess að líta við í Glenfarclas á leiðinni og kynnast framleiðslunni þar svolítið. Kvöldverður á hóteli.

 Dagsferð til Aberdeen. Ekið snemma morguns til Aberdeen og litast um í þessari þriðju stærstu borgs Skotlands, sem oft er nefnd Granít-borgin eða grái bærinn enda borgin að mestu byggð úr graníti. Hér gefum við okkur góðan tíma til að litast um og meðal annars að “spássera” á breiðgötunni Union Street, sem eitt sinn var sögð ein fegursta gata brezka heimsveldisins. Kvöldverður á hóteli.  

 Haldið til höfuðborgar Hálandanna, Inverness, sem er nyrsta borg Bretlands. Á leið þangað lítum við við á vígvellinum á Culloden-heiði, þar sem uppreisnarher Hálendinga beið afhroð gegn her konungs árið 1746 í síðustu stórorrustu sem háð hefur verið á brezkri grund. Eftir að hafa skoðað okkur um í Inverness höldum við að stöðuvatninu Loch Ness, þar sem eitt frægasta vatnaskrýmsli veraldar býr og förum í siglingu á vatninu. Góðar líkur ættu að vera á því að sjá skrímslið fræga “Nessie” sem heldur til í vatninu og sást síðast árið 1996, svo vitað sé. Komið í land við rústir Urquhart kastala og síðan haldið áfram norður eftir og komið við í viskí-eimingarstöðinni Glen Ord, þar sem við kynnum okkur framleiðsluna. Haldið undir lok dags heim á hótel og kvöldverður snæddur þar.

 Ekið frá Grantown um Loch Laggan , til Fort William og áfram til Glen Coe (Táradals). Þaðan liggur svo leiðin svo um fjöll og firnindi um Tyndrum og Loch Lomond, stærsta stöðuvatns á Bretlandi til Glasgow. Þar gistum við á Normandy Hotel síðustu nóttina. Kvöldverður á hóteli.

 Haldið út á flugvöll um klukkan 11:00 og flogið heim klukkan 14:05. Lent í Keflavík klukkan 15:25.