Færeyjar


Færeyjar eru ein minnsta þjóð Evrópu og þó Færeyjar séu hluti Danaveldis njóta þær umtalsverðar sjálfstórnar. Þær eiga sér sitt eigið þing, sem er eitt elzta þjóðþing í heimi, og sinn eigin háskóla og Færeyingar eiga sér merkilega sögu og menningu. Þá eru Færeyingar líklega sú þjóð sem skyldust er okkur Íslendingum og þjóðtungur okkar færeyskan og íslenzkan náskyldar.

Þórshöfn í Færeyjum er ein minnsta höfuðborg heims en þar er margt að upplifa og skoða auk þess sem gaman er að sækja frændur okkar heim. Í Þórshöfn er m.a. að finna Norðurlandahúsið, Listasavn Föroya, Föroya fornminnisavn, ágæta veitingastaði, kaffihús, verzlanir og hótel sambærileg því sem gerist annarstaðar í Evrópu. Hví ekki að breyta til og heimsækja granna okkar í austri, sögusvið bóka Heinesens og Barböru eftir Jörgen Frantz Jacobsen, þjóð sem er um það bil að fara að fóta sig í samfélagi fullvalda ríkja, þar sem gamli tíminn situr enn í þröngum tröðunum á Tinganesi og þar sem oftast er hægt að bjarga sér á móðurmálinu?

Ferðaskrifstofa Guðmundar Jónassonar býður úrval pakkaferða fyrir stóra og smáa hópa til Færeyja bæði í lengri og skemmri ferðir. Flogið er til Færeyja allt árið á föstudögum og mánudögum og eru eyjarnar því tilvaldar til helgarheimsókna. Þá er einnig flogið á miðvikudögum í júlí og ágúst. Til Færeyja er flogið frá Reykjavíkurflugvelli og þar er að finna litla en ágæta fríhöfn. Færeysk króna er gjaldmiðillinn í Færeyjum en hún er jafngild danskri krónu og ganga danskir og færeyskir seðlar jöfnum höndum á eyjunum. Færeysk mynt er ekki til en þess í stað er notuð dönsk mynt.

Dæmi um helgarferð til Færeyja:
Föstudagur
Flogið um hádegisbil frá Reykjavík með færeyska flugfélaginu Atlantic Airways til Færeyja. Ekið til Þórhafnar þar sem gist verður á hóteli næstu 3 nætur.
Laugardagur
Frjáls dagur í Þórshöfn. Tilvalið að líta í verzlanir og kynnast frændum okkar Færeyingum. Eftir hádegi er litast um í Þórshöfn, höfuðstað Færeyja og m.a. farið í gönguferð um elztu bæjarhlutana: Tinganes og Reyni.
Sunnudagur
Hér mætti hugsa sér að fara í dagsferð um Straumey og Austurey, sem eru stærstu eyjarnar og eru tengdar með brú. Ekið væri til Tjörnuvíkur og haldið síðan yfir til Austureyjar. Ekið þar um Eiði, og Gjógv og jafnvel komið við í Götu, þar sem Þrándur bjó. Þá mætti vel hugsa sér að fara um nýleg gong yfir á Borðey og til Klakksvíkur. Einnig mætti hugsa sér að sunnudagsmorguninn væri frjáls og því tilvalið að fara í kirkju. Eftir hádegi yrði svo farið í skoðunarferð til Kirkjubæjar þar sem meðal annars er að finna kirkju frá 12. öld, rústir af stórri gotneskri dómkirkju frá 13. öld og “Reykstofuna” íbúðarhús frá því um 1100, líklega eitt það elsta á Norðulöndum.
Mánudagur
Ekið eftir morgunverð út á flugvöll og flogið til Reykjavíkur.

Hikið ekki við að hafa samband við okkur og leita tilboða.